"دارجتنا ..والحبّ"..فقر اللغة أم فقر عقولنا ؟

« Je dis que la langue est le fondement même de l'existence d'un peuple, parce qu'elle réfléchit la totalité de sa culture en signes, en signifiés, en signifiance. Être dépossédé de sa langue, c'est être coupé du dehors, c'est se condamner à l'amnésie. »

Gaston Miron

تحضرني هذه القولة الجدّ بليغة لشاعر/رمز من "الكيباك" بالكندا..هو "غاستون ميرون" أحد الذين ناضلوا طويلاً دفاعًا عن لغة شعبهم وحماية لها من الإندثار..والتفقير..وذلك كتمهيد لموضوع يهمّنا ويمسّنا بشكل مباشر في بلادنا..موضوع الثقافة..واللغة الوطنيّة...

وهذا نصّ مداخلتي في النقاش المذكور أعلاه:

[quote="la_fortuna"]
mais là je parle de notre dialekte tunisen... je pense qu´il est pauvre en belles phrases romantiques! kes k´un tunisien pourrait dire à la femme qu´il aime... je dis bien un tunisen...
[/quote]

ماهوش صحيح..الدارجة متاعنا ثريّة..لكن نحن اللي الله غالب علينا ماناش في المستوى..كان ترجع شويّة لكلام النّاس الكبّار (عزيزك وممّاتك) توّ تكتشف في كلامهم وفي أمثالهم الشعبيّة برشة كنوز.وبرشة كلمات قليل شكون من شباب توّ مازالوا يفهموها..وكيفاش باش يفهموها بالله؟ وهمّ نهار كامل يسمعوا في "ميوعة-ريق آف آم" و يتفرّجوا على "حنّبغل-تي في"..تي كان نعملوا مقارنة بسيطة بين ثراء الدارجة متاعنا اللي غنّى بيها الهادي الجويني وعلي الرياحي والجمّوسي وصادق ثرّيا وصليحة وحبيبة مسيكة وغيرهم..والدارجة المدقدقة اللي حالتها تكرب وايّامها توت متاع اليوم ..متاع "موش نورمال" و"بااز" ..توّ نفهموا علاش برشة منّا ماعادش يعرفوا يعبّروا عن أبسط مشاعرهم أو أفكارهم بلغتهم..وهذاكه علاش انا وغيري عندنا موقف من ظاهرة "الفرانكوآراب" متاع كلمة عربي وكلمة فرنساوي..خاطر هذي نتيجتها..انّها تقتل اللغة وتمنعها من التجدّد والتطوّر الطبيعي من غير ماتتمسخ..وللأسف مع السياسة الثقافيّة والإعلاميّة غير المسؤولة اللي ماشية في البلاد..النتيجة اللي وصلنالها اليوم أكثر من متوقّعة..ومازال الشيّ على قدّام


.[quote] trah ya jmé3a hetou ntarjmouhom hal klimtin bel tounsi: lé mat9all9ch rou7il :wink: yarrak tedfenni w 3omrik atwel min 3omri! :roll:
je suis pas assez bonne en traduction,[/quote]

ثمّة قاعدة أساسيّة في ايّ عمل متاع ترجمة هي في عدم البحث عن الترجمة الحرفيّة متاع كلمة بكلمة..لأنّ ذلك امر مستحيل فكلّ لغة (فصحى او عاميّة) لها نواميسها ومنطقها الداخلي الخاصّين بها..باقيها بالنسبة للعبارات اللي قلت عليهم انجّموا نقولوا في نفس المعنى:

ماتعذّبش نفسك يا عزيزتي، ربّي يخلّيك ليّ وتعيش وتترحّم علي، ربّي يطوّل لي في عمرك...

المهمّ انّا نحاولوا نستنبطوا ونبدعوا شويّة بلغتنا في عوض مانختاروا الحلول السهلة ونحكيوا باللغات الأجنبيّة..والاّ نستسهلوا الحديث بالفرانكوآراب اللي يقضي على أصالة الدارجة وروحها ومن بعد نجيوا نظلموها ونقولوا..لاماهاش غنيّة وكلامنا ماهوش حلوّ...

[quote]
mais[b] j´essaie juste de trouver de belles expressions amoureuses en tunisien..[/b]. j´arrive pas à trouver... je trouve à chaque fois ke notre dialekte n´est pas assez riche, [b]ou ca sonne pas bien quand ca sort de la bouche.[/b]... :roll:[/quote]

كلّها حكاية تعوّد وعقليّة وثقة بالنفس..أنا شخصيًا الحمد لله ماعنديش مشكلة من الناحية هذي..نعبّر عن مشاعري بالدارجة ..كيف مثلاً نحبّ نعبّر عن حبّي لبنيّة نقول لها "نحبّك، نعشقك، نموت عليك، نهواك ونفنى في بحر عينيك..." كيف نحسّ بالرغبة تجاهها نقول لها "شاهيك"..كيف نكلّمها نجّم نقول لها "عزيزتي" "قلبي" ، "حبّي" "روحي" "ممّو عينيّ" الخ...، المهمّ انّ الواحد يكون معتزّ بإنتمائه وبلغته ويحاول يحافظ عليها ويطوّرها..وتوّ تشوف قدّاش الحكاية ساهلة وبسيطة...

وباش ما تقولش (انتِ والاّ غيرك) هذا يخرّف وعايش في الماضي..هاو بعض القصائد بالعاميّة للشاعر الكبير آدم فتحي وغنّاهم لطفي بوشناق..وهمّ برهان ودليل قاطع ظاهرلي على امكانيّة الحديث في الحبّ والتغزّل بالحبيب بالدارجة متاعنا...

اللحظة اللِي شُفْتِكْ فيها

*

اللَحْظَة اللِي شُفْتِكْ فِيهَا يَا رِيتْ نَزْرَعْهَا عْلَى خَدِّي

وَرْدَة , بِغْنَايَة نِسْقِيـهَا وْ نِتْصَنِّـتْ رِيحِتْهَا وَحْدِي

وْ نَحْيَاهَا,وِنْمُوتْ عْلِيهَا نْخَلِّيهَا حْكَايَة مِنْ بَعْــدِي

*

اللَحْظَةْ اللِي شُفْتِكْ فِيهَا يَا رِيتْ نْلَخّصْ بنِّتْـــهَا

فِي كِلْمَـة، نتْهَجَّى بِيهَا وْ قَصْدِي نِتْبَنِّـنْ طَعْمِتْـهَا

وِ نْحِسِّكْ بِيـنْ مْعَانِيـهَا عَصْفُورَة,النَّجْمَة مْخَدِّتْـهَا

*

اللَحْظَةْ اللِي شُفْتِكْ فِيهَا يَا رِيتْ نَحْبِسْـهَا فِي يْدَيَّ

وْمِنْ كُثْرِةْ مَانْخَافْ عْلِيهَا نَعْصَرْهَا بِرْمُوشْ عِيـنَيَّ

وْ نُشْرُبْهَا, لاَ نِرْوَى بِيهَا لاَ نْخَلِّي فِي الكَاسْ بْـقِيَّـة

شعر آدم فتحي

غناء لطفي بوشناق


حبّّّينا حبّينا


*
حَبِّينا حبّينا \ وأللهْ يعْلمْ بينا

بِعْنا النوم الغالي \ واستنّينا لْيالِي \ نِجْمَةْ تضْوِي عْلِينا

عْشَقْنَا العُمْر مْعَاها \ رَغْمِ اللِي عِشْناها \ في مْنامَةْ وِصْحِينا

*

لاَ عْرَفْتِكْ لاَ رِيتِكْ \ يا نِجْمَةْ وْحَبِّيتِكْ

عِشْتِكْ في أحْلامِي \ وْمِنْ أوّل أحْلامِي \ في قَلْبِي خَبِّيتِكْ

ولمّا يْطِيرْ مْنَامِي \ ومَا نْشُوفِكْ قُدّامِي \ نَعْمِلْ رُوحِي نْسِيتِكْ

*

تْصَوّرْتِكْ في خْيَالِي \ واستنِّيتْ لْيالِي

ظَنِّيتْ قَلْبِي عْرِيشْ \ للريحْ ما يْوَطِّيشْ \ وانا قَلْبِي خَالِي

بْعِيدْ عْلِيك يْعِيشْ \ كِي جْنَاحْ بْلاَ رِيشْ \ ما يْطِيرِشْ في العَالِي...

شعر آدم فتحي

غناء لطفي بوشناق



ما عنديش زهر


*

تشْهَد عليّ المْطَرْ \ والعْصَافِرْ في بَابْ بْحَرْ

آنَا لِيكْ ونْمُوتْ عْلِيكْ \ لَكِنْ ما عِنْدِيشْ زْهَرْ

*

بالساعَاتْ \ نِسْتَنَّى قَدَّام المَسْرَحْ

قَلْبِي يْدُقّْ وعَقْلِي يسْرَحْ \ وِسْكَاتِي بْكُلُّهْ حْكَايَاتْ

حْكاياتْ سْنِينْ تْعَدَّاتْ \ رِحْلَةْ بِينْ حْلُوّ وْمُرّْ

وْكِي نْشُوفِكْ يِغْلِبْنِي لْسَانِي \ تَاخُذْنِي الحِيرَةْ وْتنْسَانِي

كَايِنِّي تِمْثَال حْجَرْ

نْخَلّيكْ تِمْشِي \ وْنِفْرِشْ لْخطْواتِكْ رمْشِي

ونْضَيَّعْ فُرْصِةْ لعْمُرْ

مشْ قُتْلِكْ يا زَهْرِةْ عُمْرِي \ آنَا مَا عِنْدِيشْ زْهَرْ

*

مَرَّةْ نِحْلِمْ \ نِبْنِي لِكْ عَ القَمْرَةْ عْرِيشْ

وننْسَى اللِي مَا في حَالِيشْ \ ولمّا تْذَكّرْنِي نِتْأَلِّمْ

نِتْأَلّمْ لكِنْ لاَ نْسَلِّمْ \ لا نْمِدّ يْدَيَّ لْبَشَرْ

وْمَرَّةْ نِحْلِمْ بِيكْ مْعَايَ \ في قَهْوَةْ نْبُوحْ لِكْ بِهْوَايَ

ومَا نْحِسِّشْ بالوَقْتْ يْمُرّْ

يْطِير النُومْ \ يْفَكّرْنِي اللِي قْهَاوِي اليُومْ

ما تَعْرَفْشِي تْخَبِّي السرّْ

مُشْ قُتْلِكْ يا زَهْرِةْ عُمْرِي \ آنَا ما عنْديش زْهَرْ

*

نْقُول لْرُوحِي \ نَحْكِي لِكْ عَ الوَقْت القَاسِي

على احْوَال الناس اللِي تْقَاسِي \ عْلى رغِيف الخُبْزْ على رُوحِي

على غْنَاكْ اللِي يْدَاوِي جْرُوحِي \ على غُرْبَةْ مِنْ غِير سْفَرْ

خَايِفْ لاَ تْقُلِّيشْ نْهَارْ \ اهْدِي لِي بَاكُو نوَّارْ

نْوَلِّي نِتْجَرَّعْ في المُرّْ

وْنِتْسَبَّلْ لِكْ \ وِنْلَوِّجْ كِيفاشْ نْقُلْ لِكْ

يَا خْسَارَةْ مُشْ رَاس شْهَرْ

مُشْ قُتْلِكْ يا زَهْرِةْ عُمْرِي \ آنا ما عنْديش زْهَرْ



شعر: آدم فتحي

تلحين و غناء: لطفي بوشناق


العين اللي ما تشوفكشي



*

العِين اللِي مَا تْشُوفِكْشِي \ يا خْسَارَةْ كُلّ اللِي رَاتُه

والقَلْب اللِي مَا يْحِبّكْشِي \ قُلْ لِي آش يعْمِلْ بِحْيَاتُه

*

يا زَهْرِةْ عُمْرِي يا سَمْرَا \ م اللي نَوّرتِ لْيَالِيَّ

كايِنّي عَنَّقْت القَمْرَةْ \ وقْطَفْت الشَمْس بْعِينَيَّ

نحْلِفْ لَوْ نمْشِي عَ الجَمْرَةْ \ حُبّكْ يَهْدِي لِي جْنَاحَاتُهْ

*

آنا عُمْرِي سْقِيتُهْ بْيِدِّكْ \ شُفْتُه يِكْبِرْ بِيكْ وبِيَّ

يْفَتَّحْ كِي الوَرْدَةْ على خَدِّكْ \ يمْسَحْ لِي دمْعِةْ خُدَّيَّ

أمّا قَلْبِي مْلِكْتُه وَحْدِكْ \ اِسْمَعْ اسْمِكْ في دقَّاتُهْ

*

عُمْرِي ضاعْ وْرَايَ وخَلّى \ اوْرَاقِي تذْبِلْ بِين يْدَيَّ

ولمّا حَبّيتِكْ يا لِلَّةْ \ شَجْرِةْ عُمْرِي رَجْعِتْ حَيَّةْ

لوْ ما كنت نْخافْ مْن الله \ نْقُولْ حُبِّكْ يِحْيِي اللي مَاتُوا

شعر: آدم فتحي

تلحين: لطفي بوشناق


انتِ شمسي

*
إنْتِ شَمْسِي إنْتِ \ ما تْغِيبِيشْ \ إنتِ عُمْرِي إنتِ \ ما تْضِيعِيشْ

إنتِ روحي إنتِ \ ما تْخافِيشْ \ آنا نْحِبِّكْ انتِ \ وما نْخَبِّيشْ

*

آنا اللِي تْصَوَّرْتِك اِسْم كْتَابِي

وصَوّرْتِكْ على أوْراق شْبابِي

نستنّاك لْيالِي ولوْ ما تْجِيشْ

نخْترعِكْ في خْيالِي وبِيك نْعِيشْ

*

آنا اللي تْصوّرتِكْ على كِيفي

وصوّرتِكْ على أوْراق خْرِيفِي

نستنّاك لْيالِي ولو ما تْجِيشْ

نخترعِكْ في خْيالِي وبِيكْ نْعِيشْ

*

آنا اللي تْصَوّرتِكْ مَمُّو عِينِي

وصوّرْتِكْ بِيدِي عْلى خْطُوط جْبِينِي

نستنّاكْ لْيالِي ولو ما تْجِيشْ

نختَرْعِكْ في خْيالِي وْبِيك نْعِيشْ

*

آنا اللي تْصوّرتِكْ أحْلى بَسْمَةْ

وصوّرْتِكْ على شبّاكِي نِسْمَةْ

نستنّاك لْيالِي ولو ما تْجِيشْ

نخترْعِكْ في خْيالِي وبِيكْ نْعِيش

شعر: آدم فتحي

موسيقى: فولكلور أمريكا اللاتينيّة



http://www.adamfethi.com/htm/janah/bouchnak.htm