قصيدة جديدة لأحمد فؤاد نجم : "من حسني مبارك إلى شعب مصر"

شعر حسني مبارك .. إهداء إلى شعب مصر

ياشعبي حبيبي ياروحي يابيبي ياحاطّك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبّك محشّش مفرفش مطنّش ودايخ مدروخ واخر انسطال

احبّك مكبّر دماغك مخدّر ممّشي امورك كده باتّكال

واحبّ اللي ينصب واحبّ اللي يكدب واحبّ اللي ينهب ويسرق تلال

واحبّ اللي شايف وعارف وخايف وبالع لسانه وكاتم ماقال

واحبّ اللي قافل عيونه المغفّل واحبّ البهايم واحبّ البغال

واحبّ اللي راضي واحبّ اللي فاضي واحبّ اللي عايز يربّي العيال

واحبّ اللي يائس واحبّ اللي بائس واحبّ اللي محبّط وشايف محال

واحبك تسافر وتبعد تهاجر وتبعت فلوسك دولار او ريال

واحبّك تطبّل تهلّل تهبل عشان مطش كوره وفيلم ومقال

واحبّك تأيّد تعضّض تمجّد توافق تنافق وتلحس نعال

تحضر نشادر تجمّع كوادر تلمّع تقمع تظبّط مجال

لكن لو تفكّر تخطّط تقّرر تشغّلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنوّر وعايز تطوّر وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

هبهدل جنابك انت واللي جابك وهيكون عذابك ده فوق الاحتمال

وامرمط سعادتك واهزّأ سيادتك واخلّي كرامتك في حالة هزال

وتلبس قضّيه وتصبح رزيّه وباقي حياتك تعيش في انعزال

هتقبل هحبّك هترفض حلبّك هتطلع هتنزل هجيبلك جمااااال

أحمد فؤاد نجم