فضيحة "الصباح" : يا حسرة على كبار الحومة...

شيّ ماعاد ماشي في هالبلاد اللي ولّى كلّ شيّ فيها عمّال التالي كيف بول الجمل حاشاكم...
آخر ما الآخر فضيحة جريدة الصباح أو "صبجوت أحرنوت" كيما قال واحد من المدوّنين. معناها جريدة في تاريخ ومصداقية (التاريخية طبعًا) متاع الصباح تجي تفسّد هذا الكلّ وتعمل اللي ما تجرّئتش باش تعملوا سخافة _عفوًا صحافة_ البودورو المنقوب من نوع الشروق والحدث والصريح والإعلان والخ...

ياخسارة تضحيات الناس اللي خدمت في هالجريدة العريقة منذ أكثر من نصف قرن واللي كانت ديما مثال يحتذى في إحترام الذات والقرّاء والتعبير عن مشاعرهم دون دمغجة أو مبالغة. لكن للأسف منذ سنوات ولّينا نشوفوا في اسماء غريبة تكتب في هالجريدة العريقة من نوع كمال بن يونس والمحلّل السياسي_ المستقلّ جدًا_ بهتان مسيّس...

خسارة وبرّه، من تاريخ وطني وقومي (الصباح كانت حتّى محسوبة على صالح بن يوسف أيّام صراعُه مع بورقيبة) الى مسابقات مسمومة تهدف الى التطبيع الثقافي مع الكيان الصهيوني الذي لم يوقف يومًا جرائمه في حقّ إخواننا في فلسطين ولبنان، دون الحديث عن جرائمه السابقة في تونس...